ಗೂಗಲ್ ಸರ್ಚ್ ಎಂಜಿನ್‌ನ ಅಂಗವಾದ ಆರ್ಕುಟ್ ಸೋಶಿಯಲ್ ನೆಟ್‌ವರ್ಕಿಂಗ್‌ನಲ್ಲಿ ಇಷ್ಟೊಂದು ವೈವಿಧ್ಯತೆ ಹಾಗೂ ಸ್ವಾರಸ್ಯ ಇದೆ ಎಂದು ನನಗೆ ಈ ತನಕ ಗೊತ್ತೇ ಇರಲಿಲ್ಲ. ಕೆಲ ಸಹೋದ್ಯೋಗಿಗಳು, ಬಂಧು ಮಿತ್ರರು ಆರ್ಕುಟ್‌ನಲ್ಲಿ ಮುಳುಗಿರುವುದನ್ನು ನೋಡಿದಾಗ ಅವರ ಬಗ್ಗೆಯೇ ‘ ಇವರಿಗೆ ಬೇರೆ ಕೆಲ್ಸ ಇಲ್ಲಂತ ಕಾಣ್ಸುತ್ತೆ ’ ಎಂದು ತಪ್ಪಾಗಿ ಭಾವಿಸಿದ್ದುಂಟು. ಆದರೆ ನಿಜಕ್ಕೂ ಈ ಉಚಿತ ಆರ್ಕುಟ್ ನೆಟ್‌ವರ್ಕ್‌ನ ಉಪಯೋಗ ಸಾಕಷ್ಟಿದೆ.ಅಂದಹಾಗೆ ಇನ್ನು ಮುಂದೆ ಆರ್ಕುಟ್‌ನೊಳಗೆ ವೀಕ್ಷಣೆಯ ವೇಳೆ ನನಗೆ ಕಂಡದ್ದನ್ನು ನಿಯಮಿತವಾಗಿ ನಿಮ್ಮೊಡನೆ ಹಂಚಿಕೊಳ್ಳುತ್ತೇನೆ. ಇದು ನಿಮಗೆ ಇಷ್ಟವಾದೀತು ಎಂದು ಭಾವಿಸಿದ್ದೇನೆ. ಈ ನಿಟ್ಟಿನಲ್ಲಿ ನಿಮ್ಮ ಸಲಹೆ, ಅನಿಸಿಕೆಯನ್ನೂ ನಂಗೆ ತಿಳಿಸುವಿರಾ..
ಇವತ್ತು ಇನೋಸಿಸ್‌ನ ಮುಖ್ಯ ಮಾರ್ಗದರ್ಶಕ ಎನ್‌ಆರ್ ನಾರಾಯಣ ಮೂರ್ತಿ ಅವರ ಅಭಿಮಾನಿಗಳು ಮೂರ್ತಿ ಬಗ್ಗೆ ರಚಿಸಿದ ಆರ್ಕುಟ್ ಪುಟವನ್ನು ವೀಕ್ಷಿಸಿದೆ. ನಾಗವಾರ ರಾಮರಾವ್ ನಾರಾಯಣ ಮೂರ್ತಿ - ಭಾರತದಲ್ಲಿ ಅತಿ ದೊಡ್ಡ ಐಟಿ ಸಾಮ್ರಾಜ್ಯವನ್ನು ಕಟ್ಟಿದ್ದಕ್ಕೆ ಮಾತ್ರವೇ ಅವರು ಪ್ರಸಿದ್ಧರಲ್ಲ, ಸರಳತೆಗೂ ಅವರು ಹೆಸರಾಗಿದ್ದಾರೆ ಎನ್ನುತ್ತದೆ ವಿವರಣೆ. ೨೦೦೪ರ ಡಿಸೆಂಬರ್ ೩ರಂದು ರಚನೆಯಾದ ಈ ತಾಣಕ್ಕೆ ೪,೯೩೬ ಸದಸ್ಯರಿದ್ದಾರೆ.
ಎನ್ನಾರ್ ನಾರಾಯಣ ಮೂರ್ತಿಯವರ ಸಂಕ್ಷಿಪ್ತ ಪರಿಚಯ ಹಾಗೂ ಅವರ ಬಗ್ಗೆ ನೂರಾರು ಮಂದಿ ಅಭಿಪ್ರಾಯಗಳನ್ನು ಬರೆದಿದ್ದಾರೆ. ೨೦೦೭ರ ಮೂರ್ತಿಯವರು ರಾಷ್ಟ್ರಪತಿಯಾದರೆ ಭಾರತ ಹೈಟೆಕ್ ದೇಶ ಆಗುತ್ತಾ ಎಂಬ ಪ್ರಶ್ನೆಯನ್ನು ಮತಕ್ಕೆ ಹಾಕಿದಾಗ ೩೦೭ ಮಂದಿ ಪ್ರತಿಕ್ರಿಯಿಸಿದ್ದು( ಈ ತನಕ ), ಅವರಲ್ಲಿ ೨೧೨ ಮಂದಿ ಹೌದು ಎಂದಿದ್ದಾರೆ. ೬೨ ಮಂದಿ ಮೂರ್ತಿ ರಾಷ್ಟ್ರಪತಿಯಾಗುತ್ತಾರೋ ಎಂದು ನೋಡೋಣ ಎಂದಿದ್ದಾರೆ. ೩೩ ಮಂದಿ ಏನನ್ನೂ ಹೇಳಲಾಗದು ಎಂದಿದ್ದಾರೆ.
ನಾರಾಯಣಮೂರ್ತಿಯವರನ್ನು ಭೇಟಿ ಮಾಡುವ ಅವಕಾಶ ಸಿಕ್ಕಿದರೆ ಏನು ಗಿಫ್ಟ್ ಕೊಡುತ್ತೀರಿ ? ಎಂಬ ಪ್ರಶ್ನೆಗೆ, ಮೂರ್ತಿಯವರ ದೋಸ್ತಿಗಳಿಗೆ ಔತಣಕೂಟ ಏರ್ಪಡಿಸುತ್ತೇನೆ ಎನ್ನುತ್ತಾನೆ ಒಬ್ಬ. ಅದಕ್ಕೆ ಮತ್ತೊಬ್ಬ ‘ ಒಳ್ಳೆಯದೇ, ಆದರೆ ಗಿಫ್ಟ್ ಅಂತ ಏನಾದ್ರೂ ಕೊಟ್ಟರೆ ಒಳ್ಳೇದು ’ ಅಂತಾನೆ. ಮತ್ತೊಬ್ಬ ಎನ್ನಾರ್ ಮೂರ್ತಿಯವರ ಆತ್ಮಕಥೆ ಇದೆಯೇ ಎನ್ನುತ್ತಾನೆ. ನಾರಾಯಣ ಮೂರ್ತಿ, ಬಿಲ್ ಗೇಟ್ಸ್, ಸ್ಟೀವ್ ಜಾಬ್ಸ್ ಪೈಕಿ ಯಾರು ಬೆಸ್ಟ್ ಉದ್ಯಮಿ ಎಂಬ ಪ್ರಶ್ನೆಯನ್ನು ಮತಕ್ಕೆ ಹಾಕಲಾಗಿದೆ.
ಹೀಗಿದ್ದರೂ ತಾಣದಲ್ಲಿ ಗಂಭೀರ ಹಾಗೂ ಸಂಗ್ರಹಯೋಗ್ಯ ಚರ್ಚೆಯಾಗಲಿ, ವಿಚಾರ ವಿನಿಮಯವಾಗಲಿ ನಡೆದಿಲ್ಲ. ಆದರೆ ನಡೆಸಬಹುದಿತ್ತು ಎಂದು ನನಗನ್ನಿಸಿತು
( ಚಿತ್ರದಲ್ಲಿರುವವರು ಯಾರೆಂದು ಗೊತ್ತಾಯಿತೇ ?
ಸುಧಾ ಮೂರ್ತಿ, ನಾರಾಯಣ ಮೂರ್ತಿ, ನಂದನ್ ನೀಲೇಕಣಿ, ರೋಹಿಣಿ ನೀಲೇಕಣಿ )
No comments:
Post a Comment