೨.೧ ಕೋಟಿ ಮೊಬೈಲ್ ಡೆಡ್..ಮುಂದ ?

ದೇಶದಲ್ಲಿ ಒಟ್ಟು ೨.೧ ಕೋಟಿ ಮೊಬೈಲ್‌ಗಳ ಸದ್ದಡಗಿ ಮೂರು ದಿನಗಳು ಕಳೆದಿವೆ. ಇತ್ತ ಬೆಂಗಳೂರಿನ ಜಯನಗರದ ಒಂಬತ್ತನೇ ಬ್ಲಾಕ್‌ನಲ್ಲಿರುವ ಜೈ ಶಂಕರ್ ತಮ್ಮ ಮೊಬೈಲ್ ಫೋನ್ ಸರ್ವೀಸ್ ಸೆಂಟರ್‌ನಲ್ಲಿ ಹಗಲು ರಾತ್ರಿ ಎನ್ನದೆ ಬ್ಯುಸಿಯಾಗಿದ್ದಾರೆ. ಅವರ ಮೊಬೈಲ್ ನಿರಂತರ ರಿಂಗಣಿಸುತ್ತಿದೆ. ಅವರೆಲ್ಲರದ್ದೂ ಒಂದೇ ದೂರು.
ಸಾರ್, ನಮ್ಮ ಮೊಬೈಲ್ ನಿಂತು ಹೋಗಿದೆ. ಔಟ್ ಗೋಯಿಂಗ್ ಇಲ್ಲ, ಇನ್‌ಕಮಿಂಗೂ ಇಲ್ಲ. ಏನ್ ಮಾಡ್ಬೇಕು ಸಾ... ಮೊಬೈಲಿಲ್ಲದೆ ಯಾವ ಕೆಲ್ಸಾನೂ ನಡೀತಿಲ್ಲ... ಇತ್ತ ಕಡೆಯಿಂದ ಜೈ ಶಖರ್ ಇದಕ್ಕೆ ಏನು ಮಾಡಬೇಕು ಎನ್ನುತ್ತಾರೆ. ಮತ್ತೊಂದೆಡೆ ಚಕಚಕನೆ ಮೊಬೈಲ್‌ಗಳಿಗೆ ಹೊಸ ಗುರುತಿನ ಸಂಖ್ಯೆಯನ್ನು ನೀಡುತ್ತಾರೆ. ಇದು ಆನ್‌ಲೈನ್ ಮೂಲಕ ೨೦ ಸೆಕೆಂಡ್‌ನೊಳಗೆ ನಡೆಯುವ ಕೆಲಸ. ಆದರೂ ಗ್ರಾಹಕನ ಛಾಯಾಚಿತ್ರ, ಗುರುತಿನ ದಾಖಲೆಯನ್ನು ಪರಿಶೀಲಿಸಿ, ಬಿಲ್ ಪಡೆದು ಮೊಬೈಲನ್ನು ಹಿಂತಿರುಗಿಸುವ ಹೊತ್ತಿಗೆ ಕನಿಷ್ಠ ಹದಿನೈದು ನಿಮಿಷ ಬೇಕಾಗುತ್ತದೆ.
ಇನ್ನು ಮುಂದೆ ವಾಹನಗಳಿಗೆ ನಂಬರ್ ಪ್ಲೇಟ್ ಇರುವಂತೆ ಪ್ರತಿ ಮೊಬೈಲ್‌ಗೂ ಹದಿನೈದು ಅಂಕಿಗಳ ಐಎಂಇಐ (ಇಂಟರ್‌ನ್ಯಾಶನಲ್ ಮೊಬೈಲ್ ಎಕ್ವಿಪ್‌ಮೆಂಟ್ ಐಡೆಂಟಿಟಿ ) ಕಡ್ಡಾಯ. ಇಲ್ಲವಾದಲ್ಲಿ ಅವುಗಳು ಯಾವ ಸಿಮ್ ಹಾಕಿದರೂ ಕೆಲಸ ಮಾಡಲ್ಲ. ಹೀಗಾಗಿ ಗೊತ್ತಿದ್ದೊ ಇಲ್ಲದೆಯೊ ಐಎಂಇಎ ಖರೀದಿಸಿದ್ದ ಲಕ್ಷಾಂತರ ಮಂದಿ, ಇದೀಗ ಮೊಬೈಲ್ ಸರಿ ಹೋದರೆ ಸಾಕೆಂದು ಮೊಬೈಲ್ ಮಳಿಗೆಗಳನ್ನು ಎಡತಾಕುತ್ತಿದ್ದಾರೆ. ಅನೇಕ ಮಂದಿ ಗೊಂದಲದಿಂದ ಪರದಾಡುತ್ತಿದ್ದಾರೆ.
ದೂರಸಂಪರ್ಕ ಇಲಾಖೆಯ ಆದೇಶದಂತೆ ನವೆಂಬರ್ ಮಧ್ಯರಾತ್ರಿಯಿಂದ ಐಎಂಇಎ ಸಂಖ್ಯೆ ಇಲ್ಲದ ಮೊಬೈಲ್‌ಗಳು ಸ್ಥಗಿತವಾಗಿವೆ. ಆದರೆ ಇದನ್ನು ಏನು ಮಾಡಬೇಕು ? ಯಾರನ್ನು ಸಂಪರ್ಕಿಸಬೇಕು ಎಂಬುದರ ಬಗ್ಗೆ ಬಳಕೆದಾರರಲ್ಲಿ ಮಾಹಿತಿಯ ಕೊರತೆ ಇದೆ. ಉದಾಹರಣೆಗೆ ಸ್ಥಗಿತಗೊಂಡಿರುವ ಮೊಬೈಲ್ ಸಂಖ್ಯೆ ೨.೧ ಕೋಟಿ ಹಾಗೂ ಇದರಲ್ಲಿ ರಾಜ್ಯದಲ್ಲಿ ಶೇ.೪೦ರಷ್ಟಿದೆ ಎನ್ನುತ್ತಾರೆ ದಕ್ಷಿಣ ಭಾರತದಲ್ಲಿ ವಿಭಾಗದ ಐಎಂಇಐ ವಿತರಣೆಯನ್ನು ನಿರ್ವಹಿಸುತ್ತಿರುವ ಪ್ರಸಾದ್ ಎನ್.ವಿಎಸ್ ತಲೂರಿ.
ಆದರೆ ಬೆಂಗಳೂರಿನಲ್ಲಿ ಕೇವಲ ಐವತ್ತು ಚಿಲ್ಲರೆ ಐಎಂಇಐ ಗುರುತಿನ ಸಂಖ್ಯೆ ಕೊಡುತ್ತಾರೆ. ಇದನ್ನೆಲ್ಲ ಹೇಗೊ ಮ್ಯಾನೇಜ್ ಮಾಡಲಾಗುತ್ತಿದೆ. ಆದರೆ ಸ್ವಾರಸ್ಯ ಏನೆಂದರೆ ದೇಶದ ಭದ್ರತೆಯ ದೃಷ್ಟಿಯಿಂದ ಕೈಗೊಳ್ಳಲಾಗುತ್ತಿರುವ ಈ ಪ್ರಕ್ರಿಯೆಯೇ ಕೋಟ್ಯಂತರ ರೂ. ವಹಿವಾಟಾಗಿ ಪರಿವರ್ತನೆಯಾಗಿದೆ.
ವಹಿವಾಟು ಕೋಟ್ಯಂತರ : ಪ್ರತಿ ಗ್ರಾಹಕ ಐಎಂಇಐ ಸಂಖ್ಯೆಯನ್ನು ಪಡೆಯಲು ೧೯೯ ರೂ. ಶುಲ್ಕ ನೀಡಬೇಕು. ಅಂದರೆ ಸಾವಿರಾರು ಕೋಟಿ ರೂ.ಗಳ ಬಿಸಿನೆಸ್ ಖಚಿತ. ಈ ಗುರುತಿನ ಸಂಖ್ಯೆ ಕೊಡುವವರು ಒಂದು ಪ್ರಿಂಟರ್, ಕ್ಯಾಮೆರಾ, ಇಂಟರ್‌ನೆಟ್ ಮತ್ತು ಕಂಪ್ಯೂಟರ್ ಹಾಗೂ ಇತರ ಸಣ್ಣ ಪುಟ್ಟ ಸಾಧನ ಹೊಂದಿದ್ದರೆ ಸಾಕು. ಹೀಗಾಗಿ ಲಾಭದಾಯಕಬಲ್ಲ ಈ ಬಿಸಿನೆಸ್‌ನ ಪರವಾನಗಿ ಪಡೆಯಲು ಮೊಬೈಲ್ ಸೇವೆ ನೀಡುವವರ ನಡುವೆ ಭಾರಿ ಪೈಪೋಟಿ ನಡೆದಿತ್ತು. ಕೊನೆಗೂ ಪರವಾನಗಿ ಪಡೆದವರು ಭರ್ಜರಿ ವ್ಯಾಪಾರ ನಡೆಸುತ್ತಿದ್ದಾರೆ. ಹೀಗಿದ್ದರೂ ಎಷ್ಟು ಸಾವಿರ ಕೋಟಿ ಬಿಸಿನೆಸ್ ನಡೆದೀತು ಎಂದು ಅಧಿಕಾರಿಗಳು ಹೇಳುತ್ತಿಲ್ಲ. ಆದರೆ ಮೂಲಗಳ ಪ್ರಕಾರ ರಾಜ್ಯದಲ್ಲಿ ಕನಿಷ್ಠ ೨೫ ಲಕ್ಷ ಮೊಬೈಲ್‌ಗಳು ಈಗ ನಿಷ್ಕ್ರಿಯವಾಗಿವೆ.
ಗೊಂದಲ : ದೂರಸಂಪರ್ಕ ಇಲಾಖೆಯು ಜಿಐಐ ಕಾರ್ಯಕ್ರಮವನ್ನು (ಜೀನೀನ್ ಐಎಂಇಐ ಇಂಪ್ಲಿಮೆಂಟ್ ಪ್ರೋಗ್ರಾಮ್ ) ನ.೩೦ಕ್ಕೆ ಸ್ಥಗಿತಗೊಳಿಸಲಾಗುವುದು ಎಂದು ಆರಂಭದಲ್ಲಿ ಆದೇಶ ಹೊರಡಿಸಿತ್ತು. ಆದರೆ ನ.೨೭ರಂದು ಸೆಲ್ಯುಲಾರ್ ಆಪರೇಟರ್ಸ್ ಅಸೋಸಿಯೇಶನ್ ಆಫ್ ಇಂಡಿಯಾ-ಸಿಇಎಐ ಜತೆ ಚರ್ಚಿಸಿದ ನಂತರ ಇಲಾಖೆ ಮತ್ತೊಂದು ನಿರ್ದೇಶನ ಹೊರಡಿಸಿತು. ಅದರ ಪ್ರಕಾರ ಐಎಂಇಐ ಇಲ್ಲದ ಮೊಬೈಲ್‌ಗಳನ್ನು ಸ್ಥಗಿತಗೊಳಿಸಲಾಗಿದೆ. ಆದರೆ ಐಎಂಇಐಯನ್ನು ನೀಡುವ ಕಾರ್ಯಕ್ರಮವನ್ನು ರದ್ದುಪಡಿಸಿಲ್ಲ. ಹೀಗಾಗಿ ಗ್ರಾಹಕರು ಪರದಾಡುವ ಆವಶ್ಯಕತೆ ಇಲ್ಲ. ಸಾವಿರಾರು ರೂ. ಕೊಟ್ಟು ಖರೀದಿಸಿದ ಚೀನಾದ ಮೊಬೈಲನ್ನು ಹೋಯ್ತಲ್ಲಪ್ಪಾ ಎಂದು ತಪ್ಪಾಗಿ ಭಾವಿಸಬೇಕಿಲ್ಲ.
ಯಾಕೆ ಹೀಗಾಯಿತು ? ಚೀನಾದ ಬಹುತೇಕ ಕಂಪನಿಗಳು ಸೇರಿದಂತೆ ಹಲವು ಮೊಬೈಲ್ ಬ್ರಾಂಡ್‌ಗಳಲ್ಲಿ ನಕಲಿ ಐಎಂಇಐ ಸಂಖ್ಯೆಯನ್ನು ಅಳವಡಿಸಲಾಗಿತ್ತು. ಒಂದೇ ರೀತಿಯ ಲಕ್ಷಗಟ್ಟಲೆ ಗುರುತಿನ ಸಂಖ್ಯೆಯನ್ನು ನೀಡಲಾಗಿತ್ತು. ಆದರೆ ಇದರಿಂದ ಭಯೋತ್ಪಾದನೆ ಮುಂತಾದ ಪ್ರಕರಣಗಳ ತನಿಖೆ ವೇಳೆ ಅಪರಾಧಿಗಳನ್ನು ಅವರ ಮೊಬೈಲ್ ಗುರುತಿನ ಆಧಾರದಲ್ಲಿ ಪತ್ತೆ ಹಚ್ಚಲು ಸಾಧ್ಯವಾಗುವುದಿಲ್ಲ. ಇದರಿಂದ ತನಿಖೆಯ ಹಾದಿಯೂ ತಪ್ಪುವ ಸಾಧ್ಯತೆ ಇದೆ. ಆದ್ದರಿಂದ ಸುರಕ್ಷತೆಯ ದೃಷ್ಟಿಯಿಂದ ಅಸಲಿ ಗುರುತಿನ ಸಂಖ್ಯೆ ನೀಡಲಾಗುತ್ತಿದೆ.
ಐಎಂಇಐ ಪತ್ತೆ ಹೇಗೆ ?
ನಿಮ್ಮ ಮೊಬೈಲ್‌ನಲ್ಲಿ ಅನುಕ್ರಮವಾಗಿ * #೦೬# ಒತ್ತಿರಿ. ತಕ್ಷಣ ೧೫ ಅಂಕಿಗಳ ಐಎಂಇಐ ಸಂಖ್ಯೆ ಕಾಣಿಸುತ್ತದೆ. ಅಕಸ್ಮಾತ್ ಇಲ್ಲವಾದಲ್ಲಿ ನಿಮ್ಮ ಮೊಬೈಲ್ ನಿಷ್ಕ್ರಿಯವಾಗಿರುತ್ತದೆ