ಬೆಂಗಳೂರಿಗೆ ಮೊನೊ ರೈಲು ಬೇಕಾ ?

ಬೆಂಗಳೂರಿನಲ್ಲಿ ದಿನೇ ದಿನೆ ಟ್ರಾಫಿಕ್ ಸಮಸ್ಯೆ ಬಿಗಡಾಯಿಸುತ್ತಿದೆ. ಹಾಗಾದರೆ ಮೆಟ್ರೊ ರೈಲು ಪೂರ್ಣವಾಗಿ ಜಾರಿಯಾದ ಮೇಲೂ ಟ್ರಾಫಿಕ್ ಸಮಸ್ಯೆ ಬಗೆಹರಿಯುತ್ತಾ ? ‘ಇಲ್ಲ’ ಎನ್ನುತ್ತಾರೆ ಸ್ಕೂಮಿ ಇಂಟರ್‌ನ್ಯಾಶನಲ್ ಕಂಪನಿಯ ಯೋಜನೆ ವಿಭಾಗದ ಮುಖ್ಯಸ್ಥ ಕನೇಸನ್ ವೇಲುಪಿಳ್ಳೈ. ಸದ್ಯಕ್ಕೆ ೬ ಮೊನೊ ರೈಲುಗಳ ನಿರ್ಮಾಣ ಯೋಜನೆಯನ್ನು ಈ ಕಂಪನಿ ಕೈಗೆತ್ತಿಕೊಂಡಿದೆ.‘ ಬೆಂಗಳೂರಿಗೆ ಮೋನೊ ರೈಲಿನ ಅಗತ್ಯ ಇದೆ. ಮೆಟ್ರೊ. ಮೊನೊ ಸೇರಿದಂತೆ ಸಮಗ್ರ ಸಾರಿಗೆ ವ್ಯವಸ್ಥೆ ಜಾರಿಯಾದಾಗ ಮಾತ್ರ ಇಲ್ಲಿನ ಟ್ರಾಫಿಕ್ ಸಮಸ್ಯೆ ಶಮನವಾಗಬಹುದು.ನಾನು ಮೆಟ್ರೊ ರೈಲಿನ ವಿರೋಯಲ್ಲ, ಆದರೆ ಅದರ ಜತೆಗೆ ಮೊನೊ ರೈಲು ಕೂಡ ಬೇಕು. ಇದು ಒಂದಕ್ಕೊಂದು ಪೂರಕ. ಮಲೇಷ್ಯಾ, ಜಪಾನ್ , ಅಮೆರಿಕ, ಚೀನಾ ಮುಂತಾದ ಕಡೆ ಇದು ಸಾಬೀತಾಗಿದೆ ’ ಎನ್ನುತ್ತಾರೆ ಪಿಳ್ಳೈ. ವಿಜಯ ಕರ್ನಾಟಕಕ್ಕೆ ಕೆಲವು ದಿನಗಳ ಹಿಂದೆ ವಿಂಡ್ಸರ್ ಹೋಟೆಲ್‌ನಲ್ಲಿ ಅವರನ್ನು ಸಂದರ್ಶಿಸಿದ್ದೆ. ಆಗ ಅವರು ಹೇಳಿದ್ದಿಷ್ಟು : ಮೊನೊ ಯಾಕೆ ? ಮೊದಲನೆಯದಾಗಿ ಮೊನೊ ರೈಲು ಮೆಟ್ರೊ ರೈಲುಗಳಿಗಿಂತ ಅಗ್ಗ. ಆದ್ದರಿಂದ ಸೇವಾ ತೆರಿಗೆ ಪಾವತಿದಾರರ ಮೇಲಿನ ಹೊರೆಯನ್ನು ತಗ್ಗಿಸಬಹುದು. ಇದು ಹಳಿ ತಪ್ಪುವ ಸಾಧ್ಯತೆ ಇಲ್ಲ. ಏಕೆಂದರೆ ಏಕೈಕ ಕಾಂಕ್ರಿಟ್ ಅಥವಾ ಉಕ್ಕಿನ ಬೀಮ್ ಮೇಲೆ ಮೊನೊ ಸಂಚರಿಸುತ್ತದೆ.ಮಾತ್ರವಲ್ಲದೆ ರೈಲು ಹಳಿಯನ್ನು ಸುತ್ತುವರಿದಿರುತ್ತದೆ. ಮೊನೊ ಅಂದರೆ ಒಂದು ಎಂದರ್ಥ. ಮೆಟ್ರೊ ರೈಲು ಹೋಗದ ಕಡೆಗೂ ಮೊನೊ ಸಂಚರಿಸುತ್ತದೆ. ಹೆಚ್ಚಿನ ಮರಗಿಡಗಳನ್ನು ಹನನ ಮಾಡಬೇಕಾದ ಅಗತ್ಯ ಇಲ್ಲ. ಹೆಚ್ಚು ಸ್ಥಳವನ್ನೂ ಇದು ಬೇಡುವುದಿಲ್ಲ. ಅಗಲ ಹೆಚ್ಚೆಂದರೆ ೧೦ ಮೀಟರ್ ಸಾಕು. ರೈಲಿನ ಚಕ್ರಗಳು ಉಕ್ಕಿನದ್ದಾಗಿರದೆ, ರಬ್ಬರ್‌ನದ್ದಾಗಿರುವುದರಿಂದ ಶಬ್ದ ಮಾಲಿನ್ಯ ಕಡಿಮೆ. ಸುಲಭವಾಗಿ ತಿರುವುಗಳನ್ನು ಮಾಡಬಹುದು. ಇದರ ಪಿಲ್ಲರ್‌ಗಳನ್ನು ಬಿಟ್ಟರೆ ಉಳಿದೆಲ್ಲ ಭಾಗಗಳನ್ನು ಬೇರೆಡೆ ಸಿದ್ಧಪಡಿಸಿ ಜೋಡಿಸಬಹುದು. ಮೆಕ್ಕಾದಲ್ಲಿ ಮೊನೊ ರೈಲನ್ನೇ ಸಾರಿಗೆಗೆ ಹೆಚ್ಚಾಗಿ ಅವಲಂಬಿಸಲಾಗಿದೆ. ಬೆಂಗಳೂರಿಗೆ ೩೬ ತಿಂಗಳಿನೊಳಗೆ ಮೊನೊ ರೈಲನ್ನು ಅಳವಡಿಸಬಹುದು. ಗಂಟೆಗೆ ೪೦ ರಿಂದ ೯೦ ಕಿ.ಮೀ ವೇಗದಲ್ಲಿ ಮೊನೊ ರೈಲು ಓಡುತ್ತದೆ. ಸರಾಸರಿ ವೇಗ ಗಂಟೆಗೆ ೪೦ ಕಿ.ಮೀ. ಇದರ ನಿರ್ಮಾಣದ ವೆಚ್ಚ ಕಿ.ಮೀಗೆ ೧೫೦ ಕೋಟಿ ರೂ. ಮೊನೊ ರೈಲ್ವೆ ನಿರ್ಮಾಣ ಸಂಬಂಧ ಸರಕಾರದ ಜತೆ ಸ್ಕೂಮಿ ಗ್ರೂಪ್ ಪ್ರಸ್ತಾಪಿಸಿದ್ದು, ಸಕಾರಾತ್ಮಕ ಪ್ರತಿಕ್ರಿಯೆ ಸಿಕ್ಕಿದೆ. ಆಧುನಿಕ ಮೊನೊ ರೈಲುಗಳು ಬಹುತೇಕ ವಿದ್ಯುತ್ ಶಕ್ತಿಯನ್ನು ಬಳಸಿ ಚಲಿಸುತ್ತವೆ. ಎಲ್ಲಕ್ಕಿಂತ ಮುಖ್ಯವಾಗಿ ಮೊನೊ ಅತ್ಯಲ್ಪ ಸ್ಥಳದಲ್ಲಿ ಸಂಚರಿಸಬಲ್ಲುದು. ಇದಕ್ಕೆ ಆಧಾರ ಸ್ಥಂಭಗಳೂ ಹೆಚ್ಚಿಗೆ ಬೇಕಾಗುವುದಿಲ್ಲ. ಬೇರೆ ಸ್ಥಳದಲ್ಲಿ ಸಿದ್ಧಪಡಿಸಿ ಜೋಡಿಸಬಹುದಾದ್ದರಿಂದ ಕಾಮಗಾರಿ ನಡೆಯುವ ಜಾಗದಲ್ಲಿ ಮಾಲಿನ್ಯದ ತೊಂದರೆ ಉಂಟಾಗುವುದಿಲ್ಲ. ರಬ್ಬರಿನ ಟೈರ್‌ಗಳನ್ನು ಬಳಸುವುದರಿಂದ ಹಳಿಯ ಮೇಲಿನ ಹಿಡಿತ ಚೆನ್ನಾಗಿರುತ್ತದೆ.
ಆದರೆ ದಿಲ್ಲಿ ಮೆಟ್ರೊ ಮುಖ್ಯಸ್ಥ ಶ್ರೀಧರನ್ ಪ್ರಕಾರ ಬೆಂಗಳೂರಿಗೆ ಮೊನೊಗಿಂತ ಮೆಟ್ರೊ ಸೂಕ್ತ. ಯಾಕೆಂದರೆ ಭಾರಿ ಜನಸಂಖ್ಯೆಯ ನಗರಕ್ಕೆ ಹೆಚ್ಚು ಸಾಮರ್ಥ್ಯದ ಮೆಟ್ರೊ ಸೂಕ್ತ. ಕಡಿಮೆ ಸಾಮರ್ಥ್ಯದ ಮೊನೊಗೆ ತಗಲುವ ಖರ್ಚು ಮಾತ್ರ ಮೆಟ್ರೋಗೆ ಸಮಾನ. ಹೀಗಿರುವಾಗ ಅದರಿಂದ ಉಪಯೋಗ ಇಲ್ಲ. ಮನರಂಜನೆ ಮತ್ತು ಧಾರ್ಮಿಕ ತಾಣಗಳಲ್ಲಿ ಮಾತ್ರ ಮೊನೊ ಬಳಸಬಹುದು ಎನ್ನುತ್ತಾರೆ ಅವರು.