ಇತ್ತೀಚೆಗೆ ಪುತ್ತೂರು ಕಡೆಗೆ ಹೋಗಿದ್ದಾಗ ಯಶವಂತಪುರ-ಮಂಗಳೂರು ಎಕ್ಸ್ ಪ್ರೆಸ ರೈಲಿನಲ್ಲಿ ಬೆಳಗ್ಗಿನ ಜಾವ ನನ್ನ ಮೊಬೈಲ್ ಕಳೆದು ಹೋಗಿತ್ತು. ಅದು ಹಳೆಯ ಮೊಬೈಲ್ ಆಗಿದ್ದರೂ ಅನೇಕ ಗಣ್ಯರ ಸಂಪರ್ಕ ಸಂಖ್ಯೆಗಳಿದ್ದವು. ಅವುಗಳನ್ನೆಲ್ಲ ಮತ್ತೆ ಹೊಂದಿಸಿಕೊಳ್ಳಬೇಕಲ್ಲವಾ ಎಂದು ಬೇಸರವಾಗಿತ್ತು.ಈವತ್ತು ಕಚೇರಿಯಲ್ಲಿ ಸಹೋದ್ಯೋಗಿಯೊಬ್ಬರ ಮೊಬೈಲ್ ಬಸ್ಸಿನಲ್ಲಿ ಪಿಕ್ ಪಾಕೆಟ್ ಆಗಿದೆ. ಅದು ಎಂಟು ಸಾವಿರ ರೂ. ಬೆಲೆ ಬಾಳುವ ಸೆಟ್ ಬೇರೆ. ಅದರ ಜತೆ ಭಾರಿ ಅಟ್ಯಾಚ್ ಮೆಂಟ್ ಇತ್ತು ಎಂದು ಅವರೇ ಹೇಳಿಕೊಂಡರು. ಅವರೂ ಗಣ್ಯಾತಿಗಣ್ಯರ ಸಂಪರ್ಕ ಸಂಖ್ಯೆಗಳನ್ನು ಮೊಬೈಲ್ ನಲ್ಲಿ ಸೇವ್ ಮಾಡಿಟ್ಟಿದ್ದರು.
ಕೆಲವು ತಿಂಗಳ ಹಿಂದೆ ನನ್ನ ಸೋದರಿಯ ಮೊಬೈಲ್ ಕಳೆದು ಹೋಗಿತ್ತು. ಇನ್ನು ಕೆಲವು ಸ್ನೇಹಿತರು ಎರಡು ಸಲ ಮೊಬೈಲ್ ಕಳೆದುಕೊಂಡು ಪರಿತಪಿಸಿದ್ದಾರೆ. ಮೊಬೈಲನ್ನು ಕಳೆದುಕೊಂಡಿರದವರ ಸಂಖ್ಯೆ ಅತ್ಯಲ್ಪ.
ಮುಂಬಯಿನಲ್ಲಿ ಪ್ರತಿ ಒಂದು ನಿಮಿಷಕ್ಕೆ ಹದಿನೈದು ಮೊಬೈಲ್‌ಗಳು ಕಳವಾಗುತ್ತವೆ ಎಂದು ಎರಡು ವರ್ಷಗಳ ಹಿಂದೆಯೇ ವರದಿಯಾಗಿತ್ತು. ಬೆಂಗಳೂರಿನಲ್ಲಿಯೂ ಪ್ರತಿ ನಿಮಿಷಕ್ಕೆ ಹಲವಾರು ಮೊಬೈಲ್‌ಗಳು ಕಳ್ಳರ ಪಾಲಾಗುತ್ತಿವೆ. ಬಹುಶಃ ಎಲ್ಲ ಮೊಬೈಲ್ ವಿತರಕರು ತಮ್ಮ ಉತ್ಪನ್ನಗಳಿಗೆ ವಿಮೆ ವ್ಯವಸ್ಥೆ ಕಲ್ಪಿಸಿದರೆ ಒಳ್ಳೆಯದು ಎನ್ನಿಸುತ್ತದೆ. ದುಬಾರಿ ದರ ಕೊಟ್ಟು ತೆಗೆದುಕೊಳ್ಳುವ ಮೊಬೈಲ್ ಗ್ರಾಹಕರಿಗೆ ವಿಮೆ ಅನುಕೂಲವಾದೀತು ಎಂದು ಅನ್ನಿಸುತ್ತದೆ. ಏನಂತೀರಿ ?
No comments:
Post a Comment