ಬೆಂಗಳೂರಿನ ಗರುಡಾ ಮಾಲ್ ಸಮೀಪ ಲೈಫ್ ಸ್ಟೈಲ್ ಇದೆಯಲ್ಲವೇ, ನಿನ್ನೆ ಅಲ್ಲಿಗೆ ಹೋಗಿದ್ದೆ. ಭಾರತಕ್ಕೆ ಪದಾರ್ಪಣೆ ಮಾಡಿ ೧೦ ವರ್ಷ ಭರ್ತಿಯಾದ್ದರಿಂದ ಸಂಭ್ರಮದ ವರ್ಣರಂಜಿತ ಸಮಾರಂಭವನ್ನು ಆಯೋಜಿಸಿದ್ದರು. ಸೌಂದರ್ಯವರ್ಧಕ ಸಾಧನಗಳು, ಫ್ಯಾಷನ್ ಉಡುಪು, ಪಾದರಕ್ಷೆ, ಸೆಂಟು, ಮಕ್ಕಳ ಆಟಿಕೆ, ಉಡುಗೊರೆ, ಗೃಹಾಲಂಕಾರದ ವಸ್ತುಗಳು, ಪೀಠೋಪಕರಣಗಳ ಮಾರಾಟ ಮಳಿಗೆಯದು. ೧೦ನೇ ವರ್ಷಾಚರಣೆಯ ಪ್ರಯುಕ್ತ ಗ್ರಾಹಕರಿಗೆ ನಾನಾ ಬಗೆಯ ಉಡುಗೊರೆಗಳನ್ನೂ ಕಂಪನಿ ಪ್ರಕಟಿಸಿದೆ. ಆದರೂ ಕೈಯಲ್ಲಿ ಸಾವಿರಾರು ರೂಪಾಯಿ ದುಡ್ಡಿದ್ದರೆ ಮಾತ್ರ ಏನಾದರೂ ಶಾಪಿಂಗ್ ಮಾಡಬಹುದು. ಆದರೂ ವಿಂಡೋ ಶಾಪಿಂಗ್ ಮಾಡಬಹುದು. ಇರಲಿ. ಕಾರ್ಯಕ್ರಮದಲ್ಲಿ ಸೂಟು ಬೂಟುಧಾರಿಗಳಾದ ಕಂಪನಿಯ ಪ್ರತಿನಿಗಳು ಸುದ್ದಿಗಾರರ ಪ್ರಶ್ನೆಗಳಿಗೆ ಉತ್ತರಿಸಿದರು. ಇದಕ್ಕೂ ಮುನ್ನ ವೇದಿಕೆಯ ಮೇಲೆ ಪರದೆಯಂತಹ ರಚನೆ ಸರಿಯಿತು. ಆಗ ಬಿಗಿಯಾದ ಉಡುಪು ಧರಿಸಿದ್ದ ಮಾಡೆಲ್‌ಗಳು ನಗುತ್ತಾ ಲೈಫ್‌ಸ್ಟೈಲ್‌ನ ೧೦ನೇ ವರ್ಷಾಚರಣೆಯ ಲಾಂಛನವನ್ನು ಪ್ರದರ್ಶಿಸಿದರು. ಕಂಪನಿ ಪ್ರತಿನಿಗಳ ಪಕ್ಕ ವೈಯಾರದಲ್ಲಿ ಕ್ರಮಬದ್ಧವಾಗಿ ನಗುತ್ತ ನಿಂತರು. ಇವರನ್ನು ಕಂಡು ಫೊಟೋಗ್ರಾಫರುಗಳಂತೂ ತಾ ಮುಂದು ತಾಮುಂದು ಎಂಬಂತೆ ಕ್ಯಾಮರಾಗಳನ್ನು ಕ್ಲಿಕ್ಕಿಸಿದರು. ಕೆಲವು ನಿಮಿಷಗಳ ನಂತರ ರೂಪದರ್ಶಿಗಳು ನಗುವುದನ್ನು ನಿಲ್ಲಿಸಿ ತೆರೆಯ ಮರೆಯಲ್ಲಿ ಕುರ್ಚಿಯಲ್ಲಿ ಆಸೀನರಾದರು. ಭಾಷಣಗಳೆಲ್ಲ ಮುಕ್ತಾಯವಾಗುವ ಹೊತ್ತಿನಲ್ಲಿ ಮತ್ತಿಬ್ಬರು ಟಿ.ವಿ ಚಾನೆಲ್‌ನವರು ಬಂದರು. ಅವರಿಗೂ ಚಿತ್ರ ಬೇಕಿತ್ತು. ಸರಿ, ಮಾಡೆಲ್‌ಗಳಿಗೆ ಬುಲಾವ್ ಹೋಯಿತು. ತಟ್ಟನೆ ಕುರ್ಚಿಯಿಂದ ಎದ್ದ ಮಾಡೆಲ್‌ಗಳು ಲಾಂಛನವನ್ನು ಮುಟ್ಟುತ್ತ ಮತ್ತೆ ಪಳ ಪಳ ಹಲ್ಲುಗಳನ್ನು ಪ್ರದರ್ಶಿಸಿ ನಕ್ಕರು. ಕ್ಯಾಮರಾ ಸುಮ್ಮನಾದ ನಂತರ ಅವರ ನಗು ಕೂಡ ಮಾಯ. ಇಂತಹ ಕೃತಕ ನಗುವಿಗೆ ಥಳಕುಬಳುಕಿನ ಕಾರ್ಯಕ್ರಮಗಳಲ್ಲಿ ಸಾಕಷ್ಟು ಬೆಲೆ ಇದೆ ಎಂದು ಅನ್ನಿಸಿತು.(ಮೇಲ್ಕಂಡ ಚಿತ್ರ ಸಾಂದರ್ಭಿಕ)
No comments:
Post a Comment